政情：公民講場：政府無力止暴 失業大軍隨時殺到

政府統計處尋日發表最新數字，指二○一九年九月同上年同期比較，統計調查所涵蓋嘅行業私營機構總就業人數減少近四萬人，職位空缺數目有六萬三千多個，較上年同期減少兩成，即約一萬五千個。其中多個選定行業嘅職位空缺亦都較去年同期減少，當中主要係餐飲服務業、零售業、包括酒店、賓館等嘅住宿服務業等。呢幾個行業正正就係近幾個月以來，受示威暴亂影響最嚴重嘅行業。政務司司長張建宗（小肥張）成日話要止暴制亂，但示威抗爭行動一直未停。依家各行業生意大受影響，經濟蕭條，就業人口同職位空缺都齊齊跌，都唔知幾多人被迫加入失業大軍。小肥張對止暴制亂再得個講字，遲早人人喊打喇。