政情：立會裝中資櫃員機 重兵駐守唔驚裝修
修訂《逃犯條例》風波引發持續嘅暴力示威，示威者到處破壞外，部分商舖及中資機構成為被「裝修」目標，中資銀行櫃員機亦走唔甩，服務大受影響，市民要到相關銀行同櫃員機提款或轉帳真係分分鐘被考起。立法會秘書處尋日就發電郵通知議員，話正安排喺大樓內裝設兩部銀行自動櫃員機。立法會外有重重水馬包圍，亦有保安人員駐守，相信櫃員機都好難被「裝修」，班議員實唔使擔心提唔到款冇錢使喇。
立法會秘書處話，經過二○一八至二○一九年度嘅立法會行政管理委員會批准，現正安排喺立法會大樓裝設兩部銀行自動櫃員機，地點位於大樓大堂嘅立法會餐廳外，兩部自動櫃員機分別屬於香港上海滙豐銀行同中國銀行（香港），安裝工程將於今個月二十三日展開，預計明年一月下旬完成。
提款唔使去隔籬大廈
點解無啦啦喺大樓裝設櫃員機呢？行管會委員之一嘅立法會議員譚文豪就話，裝設自動櫃員機係因為大樓職員過往要去到立法會大樓隔籬嘅大廈先可以提款，路程比較遠，為咗方便職員，所以先有呢個決定喎。