政情：冇車租 冇嘢食 冇人去 天水圍1700萬建最廢單車公園 康文署長劉明光受靶

話說元朗區議會四名候任區議員包括富恩選區關俊笙、天盛選區侯文健、嘉湖北選區伍健偉同瑞華選區嘅林進，近日就齊齊拍片力數由康文署管理嘅天水圍單車匯合中心。其中候就話，用咗一千七百萬元去起嘅天水圍單車匯合中心連小食亭同單車舖都未有，而安裝咗嘅單車泊位亦因位置唔就腳，所以居民都唔會泊車喺度，以致出現單車亂泊情況。而林更批評康文署對單車公園管理不善，將矛頭直接劉明光。

單車徑或世界最短

片中亦有唔少搞笑片段，其中一幕係身高一米七五嘅關俊笙去到區內其中一條單車徑，話可能係全世界最短嘅單車徑，事關佢成個人瞓低去實測單車徑長度，結果只容納到三個好似佢咁上下身高嘅人。由於單車徑太短，基本上唔會有居民係嗰度踩單車。相信當區居民見到呢段片真係笑中有淚。點解？政府咁樣浪費公帑，仲唔一殼眼淚咩！而片中唔止展示可能係最短嘅單車徑，仲有最多「神柱牌」單車徑，因為呢個「柱陣」喺彎位，所以就經常令街坊踩單車經過時發生交通意外。

四名候任區議員講完單車公園同單車徑就開始比賽，由天水圍警署分別乘搭唔同交通工具，睇吓邊個最快去到流浮山消防局。結果最快嘅竟然係踩單車嘅侯文健，只係用咗十四分鐘就到達終點，比起坐輕鐵嘅伍健偉快一倍，而「包尾」嘅就係搭巴士嘅林進，足足花咗三十五分鐘。佢哋都批評現時由天水圍南去天水圍北嘅時間分分鐘仲耐過去元朗，全因區內交通規劃唔理想，加上最近政治事件令輕鐵出現如停駛、班次疏落等問題，嚴重影響街坊日常生活，建議新增穿梭屯門、元朗及天水圍嘅巴士線或點對點專線小巴，減少對港鐵嘅依賴咁話。其實區內單車公園同單車徑問題，現任區議員都反映過，劉明光有冇跟進改善，真係大家有眼見喇。