中環出更：泛民要求傳召官員 陳健波三招迎戰
立法會財務委員會正審議公務員加薪撥款，民主派立法會議員早前就要求將警隊加薪從公務員薪酬議程中抽出嚟獨立討論，又建議根據會議程序傳召相關政府部門官員到財委會作證或提供證據。財委會今日開會，對於民主派嘅要求，財委會主席陳健波（波哥）尋日就列出三招應對，唔知民主派會點接招呢？
或舉行特別會議抗拉布
由於喺財委會傳召官員並冇特定程序處理，波哥於是就提出咗三個方案，第一個方案係參考目前議員提出臨時動議程序，由財委會主席指明提交時限，等有意提出嘅議員有合理時間提出議案，做法類似常見嘅無約束力議案，亦可以喺會議上即時以書面提出，而主席作裁決前係唔會邀請政府畀意見，待議案經財委會同意先會處理。而第二個方案就係議員要至少兩日前以書面形式提交議案，但主席作出裁決前會先邀請政府就呢方面畀意見，亦會畀提案嘅議員回應，不過議案就唔需要經過財委會同意先處理喇，而至於第三個方案，就係舉行一個特別會議嚟處理。
財委會究竟用邊一個方案今日就會討論，相信拉布玩嘢當家常便飯嘅民主派都會耍花招，到時又唔知要用幾多時間喇。
卓妮