中環出更：林正財鼓勵銀髮族重投職場
雖然人人都識得講「唯才是用」，不過銀髮族嘅才幹往往因高齡而遭到埋沒。安老事務委員會主席林正財早前出席一個活動時就話，目前陸續踏入退休生活嘅人士主要係戰後嬰兒潮出生，呢代人有相當嘅教育程度，又懂得保持體魄，所以就算年紀大咗，工作能力都絕不遜色，覺得本港依家面對人口老化，所以都鼓勵銀髮族重投職場。佢仲話，其所服務嘅機構就有僱用從醫管局退休嘅醫生，當中最能幹嘅一位今年已七十三歲，認真犀利。
林正財早前出席嶺南大學一個探討長者就業嘅公眾論壇，同場嘅仲有嶺南大學副校長莫家豪、僱員再培訓局行政總監吳國强等。林席間就話，本港正面臨人口老化及勞動人口高峰期已過問題，鼓勵銀髮族重投職場既可紓緩勞動力不足，亦可緩解長者貧窮問題，而老友記喺職場中搵到生活目標，都有助改善精神健康。不過依家年齡歧視好嚴重，應徵者縱有熱誠同魄力，但年紀大嘅話，受聘機率就銳減，佢唔排除會向政府建議立法規管。
莫家豪：教職員薑愈老愈辣
主持論壇嘅莫家豪就認為，從事學術研究嘅教職員係「薑愈老愈辣」，所以理應不受年齡限制，可以教多幾年，不過本港嘅大學學額有限，難以增加教席，為顧及博士生出路，都難以向教職員提供終身教席喇。吳國强亦都認為，「年紀大，機器唔一定壞」，針對「有工冇人做，有人冇工做」，銀髮族再就業係唔錯嘅解決方法。僱員再培訓局都會提供市場主導嘅課程，希望可以令僱主同再就業嘅老友記都可以各得其所咁話。
卓妮