香港專業及資深行政人員協會喺反修例運動前委託香港中文大學亞太研究所，進行有關「專業人士參與公共事務的優勢與局限」研究。調查結果顯示，近兩成受訪者唔願意做政府諮詢及法定組織成員，而協會人士更話專業人士畀政府嘅建議「如入黑洞」。
香港亞太研究所喺今年三月至五月，透過網上問卷訪問咗七百四十六人，並喺四月至五月期間，為三十八位嚟自金融、法律、醫學、工程同建築界嘅人士，舉行五場焦點小組訪談。
調查結果顯示，受訪者樂於成為政府諮詢及法定組織成員的意願均值為六點五二分，其中高達兩成二嘅受訪者畀九至十分，低於五分嘅人佔一成八。另外，百分之四十七點七嘅受訪者就話「參與公共事務原因係希望可以提升地位、累積人脈、實現抱負同有歸屬感」，但有近五成人話「工時長、壓力大、專心專業同公司不支持」係阻礙他們參與公共事務嘅原因。
專資會副秘書長彭一邦話，專業人士畀政府嘅建議就恍如「入黑洞」，政府大多都無就建議回覆，而部分人向政府提供嘅意見比較宏觀，但因為政府部門分工分明，所以各部門出現互相推搪嘅情況。