政情：林紹輝劉貴梅夫妻檔贏區選 食長腳蟹慶祝
有人話每個成功男人背後都會有一個女人，但其實女人都可以走到幕前同成功男人一齊拍住上。喺今屆葵青區議會選舉中，爭取第五度連任石籬北選區議席嘅林紹輝，夥拍住首次出戰喺鄰區出選嘅太太劉貴梅，以「夫妻檔」身份雙雙勝出，佢哋仲買咗好大隻長腳蟹一齊慶祝添！
唔理爆「Quota」做運動補數
選舉完咗之後，兩公婆都喺各自嘅Facebook（Fb）上載慶祝當選嘅相片，見到林紹輝同劉貴梅合力捧起一隻仲大過塊面嘅長腳蟹，就知佢哋一齊勝出真係好開心。林喺Fb貼文上提到喺之前整個選舉期間一直唔敢亂食嘢，等到選舉結果塵埃落定之後先有得食好嘢，仲話要唔理有冇「Quota」食完之後先做運動補番數喎。
究竟長腳蟹係邊個嘅最愛？林紹輝就話結咗婚十七年，太太好鍾意食海鮮，佢又提到選舉過程等等為佢哋帶嚟好多壓力，所以可以同屋企人好溫馨咁食餐飯慶祝可以好好咁減壓。唔單止太太同屋企人，佢話要好好咁多謝一班好幫得手嘅助選團，仲話要另外同佢哋食餐好嘅慶祝吓同埋感謝佢哋。唔知道食咗咁多餐好嘢，佢哋要做番幾多運動先得呢？