中環出更：周浩鼎敗選謝票畀居民寸「從冇支持過你」

今屆區議會選舉，建制派大敗，民建聯四名身兼立法會議員嘅區議員競逐連任失敗，當中包括喺東涌南選區敗選嘅周浩鼎（阿鼎），而佢更加係現屆五位「超級區議員」當中唯一一位失去區議會議席嘅議員。不過即使經歷敗選嘅阿鼎，選後個幾星期一直落區謝票，但有市民兜口兜面寸佢「從來都冇支持過你」！

呢日阿鼎返到去服務咗四年嘅富東邨同裕東苑一帶謝票，佢同一班支持佢嘅市民有講有笑，仲話會繼續留喺呢一區服務大家。睇番選舉結果，其實今屆佢喺選票上都有近千五票嘅增長，落區多謝三千六百幾位投票支持過佢嘅選民都係無可厚非。

之但係，其實並唔係每個住喺嗰度嘅居民都對佢有好感。當佢笑住咁行去想多謝一位女士支持嘅時候，嗰位女士第一時間回敬咗一句「從來都冇支持過你」，兜口兜面寸阿鼎自作多情。不過，做咗咁耐政治人物嘅阿鼎，好早已經接受一定會有人唔鍾意佢嘅事實。依家失去咗「超級區議員」入場券嘅佢，唔知出年立法會選舉嘅時候點走位？

卓妮

中環出更：周浩鼎敗選謝票 畀居民寸「從冇支持過你」