中環出更：分享好老闆心得 關琋鎂：要了解員工所需
老闆同員工嘅關係其實唔單止係上司同下屬咁簡單，如果相處融洽同和諧嘅話，喺工作上能夠互惠互利之外，隨時識多個知心好友。亞太品牌發展及加盟協會會長關琋鎂(Karen)日前喺《亞太市場發展大獎二零一九頒獎典禮》暨《智識做老闆研討會二零一九》大談老闆之道，佢話關心員工係同佢哋打成一片嘅方法，只要了解大家需要啲乜嘢，咁就好容易達成目標。
Karen仲分享咗一次經歷，話說有個同事唔開心，開頭唔肯同其他人溝通，後來Karen主動搵佢單獨傾談，先知道原來佢屋企發生咗一啲事，經過溝通後，大家一齊支持佢，反而令嗰位同事心情開朗咗好多，工作效率都提升咗，從而建立互信同團隊精神。
彭玉玲：定期辦活動作獎勵
國際美容健康總聯合會創會會長彭玉玲就認為，要成為一個好嘅老闆唔單止要體諒員工之餘，亦都要具備回饋社會、對客人負責任嘅條件，而關心員工都好緊要，佢話要多啲同員工接觸同溝通，將心比心，了解佢哋嘅需要就可以彌補不足，亦都會定期舉辦活動獎勵吓大家，例如去外地旅遊等。佢同時希望新人可以畀舊嘅員工帶住做嘢，又舉例話佢喺國內嘅分公司會做得足啲，透過活動增進感情。
李基銓：管理方法各地有異
當日仁濟醫院總理許夏林、香港電競總會副主席陳龍盛同香港電商協會創會會長李基銓都喺度，李基銓話從事電商行業大部分都係以年輕嘅朋友為主，首先要了解佢哋嘅心態，先至管理得到成個團隊，佢又話因為兩岸三地都有生意，所以每個地方要用番當地嘅思想同手法管理，例如聘請團隊嘅時候，起步盡量搵一兩個負責管理嘅人熟悉當地文化，好似佢喺台灣工作夥伴嘅太太係台灣人，「喺當地慢慢勾到條線」，有所在地嘅資源配合，再逐步發展生意。
卓妮