中環出更：陳柏熹細個送摺紙 家人話大吉利是
好多人都鍾意砌吓模型、摺吓紙，但原來好多設計師嘅靈感都係源自呢啲基本嘢，但可能佢哋嘅諗法比較特別，好多設計師細細個都會畀屋企人鬧喎，當中產品設計師陳柏熹細個好鍾意摺紙，仲試過送畀屋企人，但屋企人就唔鍾意，點解呢？
紙紮唔老利 長大後反成事業
原來陳柏熹嘅屋企人話送紙紮嘢「大吉利是」、「唔老利」，但其實都好支持佢摺紙嘅，後尾佢仲拎過幾次關於摺紙嘅世界冠軍，同埋創下建力士世界紀錄。佢話當中最得意嘅一次經歷就係試過幫航空公司做宣傳，摺一架兩米長嘅飛機，最後用鐵架做支撐先搞得掂。之後佢又試過幫朱古力公司，用摺紙砌一個花園，最後要用水管做花莖，有咗呢兩次經歷，佢就明白到原來摺紙唔一定全部用紙，索性試吓摺其他嘢，而今次嘅折疊式真皮手袋就係成果，佢仲話女朋友都好鍾意，畢竟有免費手袋用呀！
黎意雄愛立體 大學讀產品設計
另一位產品設計師黎意雄（阿蟲）就自爆話細個好曳，有時會因為好奇而拆爛屋企啲嘢，好多時諗住就算拆開，都可以合得番，但事實上就永遠都合唔番，搞到成日畀屋企人鬧。雖然屋企「爛晒」，但佢就對立體嘅嘢產生咗興趣，後嚟仲喺大學階段就讀產品設計，呢幾年已經可以推出自己嘅產品啦！佢話本身搞唔掂今次嘅產品，最後靈感源於食飯時同朋友吹水，發現自己一放鬆，啲靈感就會係咁嚟，所以話靈感真係好重要。
香港設計總會項目總監吳綽芝話十年前都係設計師，諗番起做設計嘅時候都話好辛苦，仲成日都好夜瞓。成日夜瞓會唔會有乜嘢保養措施？佢就話只要keep住有熱情、有衝勁就係最好嘅保養方法，仲自嘲「望落好後生，其實好老」。佢話設計師放假嘅時候，個腦都仲會不斷轉動，基本上都冇乜休息，但如果遇見新事物就等於設計師嘅「營養」，令設計師嘅「生命」得以繼續持續落去，反而冇新事物嘅出現，先會令佢覺得好悶同好攰添！
卓妮