中環出更：克服細膽羞澀 周旋鼓勵小孩上台獻藝
音樂可以陶冶性情，登台獻藝則鍛煉性格。女高音歌唱家周旋早前同香港樂團合作舉辦音樂會。儘管經驗豐富嘅周旋對今次演出都感到壓力，因為佢嘅一對年幼子女同稚齡學生都有參與，其中年紀最細嘅表演者只得三歲，要令到小朋友喺舞台上順利演出，論難度，要較自己個人獻藝要高好多。
雖然面對挑戰，但周旋始終認為小朋友登台表演，有利於鍛煉膽量同應對能力。佢話囡囡本來忸怩腼腆，見到陌生人就連講句叔叔或姨姨都羞於啟齒，而登台表演就要克服自己嘅緊張情緒，正好針對小朋友內向羞澀嘅性格。至於周旋自己嘅登台經歷，亦係由三歲開始。
蕭曼貞：忘記歌詞 臨急用上句填補
周旋嘅高足蕭曼貞，亦有份喺音樂會上擔任獨唱嘅環節。雖然蕭曼貞具有相當嘅演出經驗，兼且登台前都會做好充分準備，然而喺舞台壓力之下，佢都試過緊張到腦袋空白。佢話某次台上獨唱期間，突然忘記下一句歌詞，於是人急智生，即刻將忘記嘅歌詞由上一句歌詞填補。由於台下觀眾嘅注意力都集中喺佢嘅聲線同演繹技巧，以致歌詞唔同咗都冇人發覺。佢又話每次上台表演，通常只係唱一兩首歌。原因係周老師傳授嘅運氣技巧，往往因過於緊張而打亂咗，唔能夠唱足整場音樂會咁話。
馬浩文大女識四式泳術五級鋼琴
音樂會台下嘅觀眾，好多都係城中名流，唔單止有蕭曼貞嘅媽咪、善德基金副主席蕭何元鳳同親友拉隊捧場，香港義工聯盟常務副主席馬浩文亦係座上客。講起音樂，馬浩文話時下嘅小朋友，好多都識得操作一至兩種樂器，而佢三個仔女就選擇學鋼琴。佢話家長都喜歡培養仔女對音樂嘅興趣，但佢認為眾多課外活動當中，最值得學習嘅係游水，因為識得游水，必要時就係一種求生技能，而佢嘅大女雖然今年只得九歲，但早就識得蛙式、蝶式、自由式同背泳等游泳四式，兼且仲係學校泳隊成員，同時又掌握五級鋼琴技巧，可謂動靜皆宜。
卓妮