中環出更：象哥瞓覺往績惹挑機 鬧許智峯撩是鬥非
立法會會議由朝開到晚，有時啲議員都會頂唔順要提吓神。建制派議員黃定光（象哥）過去成日被發現喺會議期間瞓覺，話說民主黨（白鴿黨）議員許智峯（峯鴿）尋日喺會議上話象哥之前喺會議上瞓覺，仲話唔應該出糧畀呢類議員，搞到象哥隨即發火反駁話佢撩是鬥非。
建制不滿拖延內會選主席
話說立法會內務委員會尋日召開會議，繼續討論選舉正副主席嘅事，但由復會至今開到第八次會議，都仲係處理緊由民主派議員所提出嘅無約束力議案，包括要求立法會秘書長陳維安出席會議。期間有建制派不滿，認為應盡快選出主席，仲話拖延內會搞到唔少工作停頓係浪費公帑。
其後到峯鴿發言時，就話建制派有份支持修例而惹起風波，搞到依家社會一鑊泡都未道歉。咁啱當時象哥離開緊會議廳，點知就畀峯鴿捉住嚟講，話佢喺禁蒙面法個會上瞓足成日，象哥隨即反駁話自己係去廁所，同埋話「搞錯啊幾時有瞓過啊，黐線」。雖然峯鴿之後講番正題，但似乎象哥氣難下，一歸位嗰下仲鬧佢撩是鬥非，到峯鴿行開時仲直頭質問佢去邊度添！正所謂冤冤相報何時了呢，本身立法會氣氛已經好僵，再互相指罵又有乜嘢意思呢。
卓妮