政情：立會上演黨友內訌 梁君彥舌戰梁美芬
立法會議員唔少都有政黨背景，其中有啲政黨議席較多，但人多未必好辦事，好似議會中嘅第二大黨尋日就公然出現內訌場面。
議員梁美芬本身係《2019年司法人員（延展退休年齡）（修訂）條例草案》委員會主席，立法會大會尋日審議呢條草案，佢當然特別肉緊，但喺全體委員會階段時就遭到身為立法會主席嘅黨友梁君彥警告離題。
去到三讀辯論時，梁君彥又指梁美芬離題，提醒三讀辯論應該是否整體支持，唔係講草案優劣，搞到早前講得唔夠暢快嘅梁美芬發火，質疑梁君彥唔清楚草案委員會嘅討論，但梁君彥反應迅速，反指梁美芬唔清楚三讀辯論嘅情況。
被中止發言 梁美芬嬲爆走人
兩人鬧到疊晒聲，梁美芬堅持要講委員會嘅關注，而梁君彥就話應該早喺二讀辯論時講，但梁美芬唔理會繼續發表偉論，原因係二讀辯論時講唔晒喎，最終佢講多兩分鐘後，梁君彥就下令要佢停止發言，最後梁美芬嬲爆爆除低咪高峰轉身離開會議廳，呢場黨友過招就落幕喇！