中環出更：密會李漢奸AV仁岑子杰 漢奸黎區選過後又攪局
修例風波引發激烈嘅衝突超過五個月，喺呢幾日先稍為平靜，然而被內地官媒狠斥「叛國禍港四人幫」之首嘅壹傳媒黎智英（漢奸黎）又同八名泛民主派人士密會，當中包括同為「叛國禍港四人幫」、有「李漢奸」之稱嘅民主黨（白鴿黨）創黨主席李柱銘同前主席何俊仁（AV仁），仲有發起過多次反修例遊行嘅民陣召集人岑子杰，而岑喺日前嘅區議會選舉中當選。喺區選過後，唔知佢哋密會係咪又想諗計攪局呢？
高達黃浩銘單仲偕林卓廷李卓人亦到場
尋日傍晚約六時，漢奸黎嘅七人車駛回其位於何文田嘅寓所，車上載着李漢奸、AV仁、因違法佔領行動（佔中）案被判囚八個月、但獲緩刑兩年嘅白鴿黨前主席李永達（高達）、同因佔中案被判囚八個月、上月初刑滿出獄嘅社民連副主席黃浩銘、白鴿黨嘅立法會前議員單仲偕同現任立法會議員林卓廷。其後七人車再駛離寓所，約六時四十五分返抵時，則見載着岑子杰同曾收漢奸黎秘密捐款「袋住先」九個月嘅工黨立法會前議員李卓人。
佢哋入咗漢奸黎寓所後，直至約八時三十分，見單仲偕先行離開。相隔半小時，即約九時，其餘七人則坐車離開，當時漢奸黎亦有喺門口送客。其後部車駛至太子港鐵站，李卓人、岑子杰、林卓廷、高達同黃浩銘落車，當時見到早前遇襲嘅岑子杰仍然撐住拐杖，眾人分頭離開後，部車就載李漢奸同AV仁返回港島嘅寓所。
漢奸黎多次參與反修例遊行，仲扮總指揮，喺遊行前亦會密會泛民人士，近三個星期就更頻密。由於呢幾日冇發生任何激烈衝突，令日前嘅區選順利舉行，而岑子杰、單仲偕同林卓廷都喺區選中當選，唔知喺區選過後漢奸黎又急急密會呢班泛民人士，喺約三個鐘嘅密會裏究竟傾咗啲乜嘢呢？
卓妮