中環出更：朱凱廸謝票 畀阿伯爆粗狂鬧
放棄自決立場嘅立法會議員朱凱廸成功入閘參加今屆區議會選舉，出戰元朗八鄉南選區，但最終落敗。社交網站流傳一段短片，佢喺西鐵錦上路站謝票時，遭一名老伯爆粗指罵，鬧朱凱廸話中國人係「支那」人。
話依家年輕人唔識中華文化
短片長約一分三十六秒，手持紙牌嘅朱凱廸喺錦上路港鐵站門外謝票期間，一名老伯上前不停講粗口鬧朱，朱開頭問老伯係咪仲要撐北京、共產黨同警方？老伯就好勞氣咁答，四十歲以下，「孝、悌、忠、信、禮、義、仁，一個字都唔X識啊，我唔係撐北京啊，我係撐中華文化啊！」朱反駁，「共產黨唔畀香港人做中國人，你知唔知啊？」老伯就鬧朱話中國人係「支那」人。
剛啱有三個途人經過同勸交，有人話老伯可以鬧，但就唔好講粗口。老伯一於少理，仲叫人行開，「我依家就X佢，就係要喺咁X多人面前X X佢」。喺朱左手邊戴眼鏡嗰位女士忍唔住寸老伯，「你X得好犀利啊，講粗口就得o架喇，講粗口就有道理啊？」另一位戴帽嘅女士就善意提醒老伯唔好咁勞氣，要小心身體，但老伯竟然話自己係為英女王服務嘅，「伊利沙伯女王三十七年從來冇一日民主」，不停咁問朱「光乜X嘢復啫？」
戴帽女士叫老伯唔使咁激動，擾攘一輪之後，老伯又爆粗鬧戴眼鏡女士，呢位女士再勸老伯「講嘢唔使講粗口o架」。
卓妮