政情：醫護上前線救援惹質疑 陳沛然：中立不等同沉默

陳沛然嘅文章題為「為何我要做人道救援？」文中話同意喺醫院或急救站做醫生時要保持中立，但係佢有兩份受薪工作，醫生同立法會議員，做立法會議員時唔可能中立，要投票、要表態，而有啲人就將中立同中間混為一談，又重申醫護人員要保持嘅中立，係指無論傷者係警察定係示威者，都會一視同仁咁提供救援。

強調中間同中立唔同

佢話早喺九月初已去信九個非政府機構，作出人道救援求助，但三個月以嚟只有兩個書面回覆同一個口頭回覆，於是佢再回覆話，如果本地無機構做人道救援，佢惟有親自上陣，又話做人道救援工作，基於佢嘅特殊身份同安全考慮，通常都係一個人，而急救隊同醫療隊都冇大台，佢亦冇加入或組織任何醫療隊。

有意見認為佢應該保持中立，默不作聲，佢列舉多宗事件，包括有醫護被指向警員洩露六一二反修例傷者嘅私隱；受傷市民不敢到醫院求醫；香港嘅救援機構未有作出人道救援同義務急救員喺理大被捕等等，若果佢喺呢五個月嚟對以上嘅事情都默不作聲，又會有另一批人來對佢口誅筆伐。佢強調中間同中立係完全唔同嘅，默不作聲，唔係中立。