中環出更：大學烏煙瘴氣 陳健波叫校長反省道歉
最近理工大學同中文大學校園爆發嚴重衝突，破壞同焚毀校園，立法會保險界陳健波（波哥）尋日就喺Facebook上載咗一條片，話大學搞成咁，校長同教職員有重大責任，希望每年七百幾萬元薪酬嘅校長同管理團隊一定要檢討吓，唔單止要向市民認錯道歉，仲要清楚解釋(口架)，好似要交代點樣糾正錯誤，如果唔係，市民唔想再浪費錢喺大學呼聲只會愈嚟愈大，到時喊都無謂啦！
校園檢萬計汽油彈 極度危險
波哥話警方喺校園內檢到數以萬計汽油彈，又有大量極度危險嘅化學品遺失，對警察及市民都產生極大危險，大學被搞到烏煙瘴氣，好多市民都好谷氣喎。而香港法例規定，大學有極大自主權，所以大學發生咁嘅事，一定要由大學管理當局負責，唔好諗住將責任推畀其他人咁話！
之後又話坊間已有意見指大學發生呢啲醜事，點解仲要每年撥二百二十億元公帑去支持佢哋去誤人子弟，不如將啲錢攞去資助香港學生海外或者國內升學，而大學用地就用嚟改建公屋或者居屋，起碼可以住到幾十萬人喎。佢話如果校方唔想變成咁，就一定要做啲嘢喇，要承諾唔會重蹈覆轍，免家長痛心疾首。
卓妮