中環出更：辦機構推廣運動 江嘉惠願望係收檔
好多人做生意都係為咗賺錢，但凝動香港體育基金總幹事江嘉惠（Judy）尋日喺一個社企論壇上竟然話好想間機構執笠喎。唔通佢好想「冇工返」？
Judy話佢有份搞嘅呢個基金會係一個慈善團體，目的係為咗推廣每人每日至少做一個鐘頭運動嘅理念，仲提到好多香港人本身都冇做運動嘅習慣。佢解釋，話若果人人都培養到日日做運動嘅習慣，佢搞嘅呢個機構就再冇存在嘅需要，仲話佢真係好希望呢個機構可以快啲「執笠」！
出身基層嘅Judy好體會依家唔少基層小朋友連接觸運動嘅機會都未必有，所以佢想出一分力幫吓呢班缺乏資源嘅學生，等佢哋都可以有機會學習唔同嘅體育項目。點解揀咗運動做主題？佢話本身患有心漏病，讀小學時唔上得體育堂，但做完手術之後依家可以跑到十公里長跑。佢仲形容自己係團隊入面最廢，因為其他成員有好多都入過港隊。
徐伽：搞天台農場 宣揚粒粒皆辛苦
轉頭見到論壇籌委會成員、香港青年工業家協會常務副會長張益麟同搞開市區天台農場嘅雲耕一族聯合創辦人徐伽（Andrew）。Andrew就話屋企人一開頭知道佢搞創業之後就成日轉發公務員嘅招聘廣告畀佢，但依家就變咗幫佢剪低公司見報嘅紀錄。Andrew又提到呢啲天台農場嘅價值唔係喺農作物身上，而係希望透過畀參與者去親身體驗，學識粒粒皆辛苦，同凡事都需要時間去等待嘅道理。
陳浩民愛講道理 畀長者話長氣
至於創辦咗高齡體驗活動組織「歷耆者」嘅陳浩民（Herman）就話本來諗住好了解長者，但首次招募長者義工時先發現班老人家比佢更加認真，唔單止堅持要親身試啲裝置，仲畀咗好多好有用嘅意見。Herman仲提到依家去學校嘅時候，成日都畀學生叫佢做叔叔，不過成日講好多大道理嘅佢亦都講到，試過畀班長者話佢講嘢長氣添！
卓妮