政情：主席台又爆混亂 盧偉國趕譚文豪走
立法會議員好多時都喺開會時有爭拗，立法會工務小組委員會主席盧偉國（WK）主持會議手法屢受質疑，無論建制定泛民好多時都會批評佢。話說喺尋日嘅小組會議上，WK又同公民黨郭家麒爭拗，之後仲引起成班泛民不滿，郭嘅黨友譚文豪幫口之餘，仲被趕離場添！
一般喺委員會會議上，如果冇議員就相關議案發表意見，委員會主席都會開始進入表決程序。喺尋日嘅會議上，本身唔係委員嘅郭家麒就列席會議，仲打算發言添，而當時WK都有話過雖然佢唔係委員，但都畀佢發表下意見。
但郭家麒一開始就未有發表意見，反而係要求點算法定人數，但因為正正佢唔係委員，所以WK就唔畀佢點，最終由其他議員代為提出。喺會議有足夠法定人數之後，WK就話進入表決程序，成班泛民一聽到就火起狂鬧，批評WK破壞程序，郭家麒亦都講過係有意見發表。
WK就話因為已經進入表決程序，仲向郭道歉，同埋話畀佢聽要等表決完就可以發言，但班泛民就繼續不滿，期間譚文豪同埋范國威仲幫口，走埋出主席台前同WK理論添，但WK就只係警告譚，話佢行為極不檢點，仲要求佢離開會議室。話時話WK主持會議成日被質疑，經常搞到開火，唔知佢有冇反思過呢？