政情：午休小休唔夠喉 梁君彥提早收工

由於內務委員會仲未選出正、副主席，無人可以喺每個星期嘅馬拉松會議中，幫梁君彥頂一頂，等佢可以食飯同去廁所，所以呢幾次會議都有小休同午膳畀佢鬆一鬆，都算係人性化嘅安排。

話怕示威活動影響交通

而尋日嘅會議上，繼續例牌設有呢兩個休息時間，中途又因為有議員被逐而會議暫停近一小時，仲要放完半個鐘頭小休後，一開番會就宣布完會。梁君彥就話休息期間同議員商討過，因為各區有激烈示威活動而影響交通，為安全起見唔繼續會議，不過仍然會喺今早九時續會。

老實講，由十一點開始嘅會議開到好似斷截禾蟲，再要提早咁多完會，計落尋日都唔係開咗好耐會囉。尤其係建制派喺呢幾個星期嘅會議係咁拉布，擺明係唔想畀泛民主派提出嘅彈劾動議開波，梁君彥係咪幫手拉布助攻呢？