政情：正副主席未見人葉劉坐住主席台

尋日市面交通混亂，而會議晨早舉行，同時間又有其他會議，可以預計到未必個個議員可以準時出席。主持會議嘅葉劉就問，有冇需要進行選舉正、副主席，但在場議員紛紛話唔需要，迅速完成有關程序，決定繼續由舊年嘅正、副主席擔任。

柯創盛大讚德高望重

之不過，正、副主席都仲未現身會議室，葉劉顧全大局下就話，會主持到正、副主席是但一人返到會議室，仲叫官員入場開會。喺呢個時候，秘書就笑住細細聲同葉劉講嘢，似乎係提醒葉劉做法不妥，搞到葉劉都即刻詢問在場議員，同唔同意由佢繼續主持，而會議室內嘅議員異口同聲話同意，其中議員柯創盛仲大讚葉劉德高望重添！所以葉劉先繼續坐喺主席台上，而幾分鐘後，正、副主席陸續返到接手主持工作喇！