中環出更：三罷搞到立立亂漢奸黎又攪局
本港嘅暴力示威持續超過五個月都未停止，被內地官媒狠斥為「叛國禍港四人幫」之首嘅壹傳媒黎智英（漢奸黎）就密密攪局。網民發起「三罷」行動前夕，佢先至同同其一樣有「搞事四人幫」之稱嘅天主教香港教區前主教陳日君等人會面，點知事隔三日，漢奸黎尋晚又再喺屋企攪局，出席嘅就包括因違法佔領行動案（佔中案）被判囚八個月獲緩刑兩年嘅民主黨（白鴿黨）前主席李永達（高達）、該黨立法會議員林卓廷同工黨立法會前議員李卓人。三罷搞到本港立立亂，佢哋仲有閒情逸致見面，唔通嫌本港唔夠亂，仲要密謀再搞亂檔？
漢奸黎周日（10日）先喺其何文田寓所密會陳日君，同場仲有劉勝義神父，而漢奸黎嘅左右手Mark Simon亦都同一對外籍男女一齊出席。而尋日，三罷行動幾乎癱瘓香港，連教育局都跪低宣布停課，漢奸黎竟然仲攪局。
密會高達林卓廷李卓人
話說漢奸黎尋日下午五時先返抵寓所，至傍晚六時許，高達同埋多次喺反修訂《逃犯條例》遊行當中，有如漢奸黎保鏢嘅林卓廷，以及曾被揭發將漢奸黎嘅秘密捐款「袋住先」九個月嘅李卓人，齊齊乘坐由漢奸黎司機駕駛嘅七人車到達漢奸黎寓所。高達喺副駕駛座，林、李二人就坐喺座駕後排位置。
三人抵達黎宅後隨即步入宅內，逗留咗近三小時，直至晚上約九時三十分，先至乘漢奸黎嘅七人車到旺角警署外，其後再各自散去。查實每逢本港有亂事發生，漢奸黎都會頻頻攪局，過去幾個月嘅反修例遊行，佢都有參與，甚至扮演總指揮，真係唯恐天下不亂咁，唔知今次佢又想搞邊科喇！
卓妮