中環出更：驚全家中招 陳凱欣：外傭要打流感針
衞生署尋日派員到立法會為一班立法會議員接種流感疫苗，食物及衞生局局長陳肇始都有現身，其前下屬、曾任食衞局局長政治助理嘅立法會議員陳凱欣打針時，佢都有企喺旁邊合照。陳凱欣就話，佢一家大細每年都會打流感針，因為試過一對仔女患病，最終搞到全家人都病埋喎。
陳凱欣話，每年一家大細都會到診所打流感針增強抵抗力，因為曾經遇上流感肆虐，一對仔女先後患病，而佢因為要照顧仔女而受感染，搞到發燒，最後仲連累埋老公都不幸中招，全家一齊病。佢又提到，家中嘅外傭平日既要照顧家人起居，假日就會同同鄉有好多接觸，為免互相感染，僱主都應該安排外傭打流感針。
食緊薄血藥 邵家臻唔打得
社會福利界立法會議員邵家臻係尋日唯一一名被評為不宜接種預防疫苗嘅議員。因為邵今年五月接受「通波仔」手術後要食一年薄血藥，防止血管再度栓塞。因薄血藥會減弱血液凝結，所以必須小心留意一切皮膚損傷，打針前醫護人員亦須掌握接種對象所服用薄血藥嘅生產商同分量。由於邵尋日無法向護士提供相關資料，所以就唔可以打針喇。
卓妮