政情：黃遠輝讀過考古 旅行首選博物館
每個地方都有自己嘅文物古蹟歷史，要靠現代人好好珍惜先可以繼續保存落去，日前喺一個文物古蹟展覽活動中，見到房委會資助房屋小組主席黃遠輝，見佢睇展覽睇到全神貫注，問佢喺呢方面係咪好有興趣？佢話鍾意睇文物古蹟，仲自爆早年有修讀考古課程添！
佢話早年去到北京同西安長安城參觀，由中央考古研究所帶領佢哋去睇一批從未展出過嘅古物，數量非常多而且十分珍貴，令佢大開眼界，自此之後對考古文物更加加深興趣，佢仲透露會喺香港及外國參觀唔同嘅博物館同展覽館，了解下當地人文化同歷史背景底蘊。
稱有好規劃 發展保育可共存
去外地旅行又點呢？佢話好多人都會選擇去購物行街，而自己就會首選博物館同文化古蹟，仲話幸好老婆都鍾意去睇呢啲歷史文物，所以兩公婆去旅行完全唔會有任何拗撬，佢話香港地方細，發展建築時難免會破壞一些具有歷史價值的文物係好可惜嘅，覺得其實發展同保育可以兩者並存，只要有一個良好嘅規劃，好讓歷史繼續流傳下去。