政情：公民講場：叫市民照食「催淚果」 陳肇始知衰終補鑊

示威活動持續咗近五個月，幾乎每個星期都有催淚彈「放題」。一直以嚟政府都冇乜點提及市民若果遇到催淚煙應該點做，上周食物及衞生局局長陳肇始喺立法會開會時，亦都被議員質問佢市民應該點樣去處理催淚煙殘餘物質，如果喺果欄買嘅生果被催淚煙污染又點算。點知陳當時竟然話搵水沖吓可以照食，其離地言論隨即被議員炮轟，仲有人話要請佢食催淚煙生果。事隔一周，陳唔知係咪驚要食「催淚果」，終於肯叫衞生署做吓嘢，佢尋日就話衞生署將會公布有關吸入咗催淚煙可以點樣處理嘅建議，真係後知後覺喇。