政情：資料被盜用預約捐精 高松傑反擊搞事者
社會近期激烈衝突持續，網上起底甚至惡搞嘅情況亦好嚴重，立法會議員梁美芬就曾被盜用個人資料登記捐贈器官，而香港菁英會副秘書長高松傑就唔止被人盜用資料，仲要幫佢預約捐精，佢就直斥呢啲行為離晒大譜，仲叫搞事者慳番啲時間，做番啲正經嘢。
稱長期捐血 唔使替佢約捐嘢
高松傑日前喺社交網站上載咗一張捐血相，仲貼文話今年已經係第四次捐血，十二月將挑戰第五次，邁向四十次大關，又手持顯示佢係B型血嘅公仔，呼籲市民快啲捐血。不過佢突然話鋒一轉，話想同班日日犯法盜用資料去惡搞嘅暴徒講，叫佢哋專業啲，唔使再同佢預約捐嘢，因為佢唔止係長期捐血者，亦係一個志願骨髓捐贈者同志願器官捐贈者等等，叫佢哋不如慳啲時間，停止惡搞，又揚言唔會向惡勢力低頭。
高解釋，早前聯同一班義工去清理連儂牆標語同塗鴉後，網上惡搞同恐嚇就未停過，每日都接到電話查詢佢係咪訂咗酒店房、旅行團等，最離譜係收到家計會嘅電話問佢係咪預約捐精，佢已忍無可忍，所以要講清楚，叫搞事者唔使再打佢主意喎。