入境處打擊假難民 港姐拍片籲勿請黑工
假難民問題一直困擾本港，入境處最近就拍攝咗最新宣傳片，呼籲僱主唔好聘請持「行街紙」嘅人士，等假難民冇得喺香港打工賺錢，減少誘因留喺本港，務求令假難民人數逐步下降。不過今次就有別政府一般宣傳片，入境處今次運用咗生動嘅拍攝手法，一開始就問有咩人要避之則吉唔好請？仲問係大懶蟲，定係是非精添。而短片另一亮點就係有港姐坐鎮，認真犀利。
短片之後就開估，答案當然係持「行街紙」嘅人士啦。短片指出，就算人工幾低都好，佢哋隨時係免遣返聲請申請者，所以當然唔好請喇。此外，喺人哋屋企打工嘅外傭同埋訪港旅客亦都唔可以聘請，總之就千祈唔好犯法，否則隨時會坐監，最高刑罰係監禁三年同罰款三十五萬元o架，問你驚未。
搵正未來港姐演Madam
而呢條宣傳片仲有一個亮點，就係搵咗今屆港姐亞軍王菲去飾演入境處Madam，認真有睇頭，原來入境處為短片選角時，係冇諗過會搵到未來港姐，所以係純屬巧合喎。