政情：保暖背心似避彈衣 張國鈞被笑「好保安」
立法會保安事務委員會尋日開會繼續進行正、副主席選舉，委員之一嘅議員張國鈞（Horace）就着住件好似避彈衣嘅背心出席會議，有民主派議員見到都話要提名Horace做委員會嘅主席，因為Horace着住件防彈背心「好保安」，非常適合做主席咁話。不過亦都有議員笑Horace好似酒店大堂經理，真係搞笑。唔通最近多暴力場面，所以Horace要着「避彈衣」自保？
Horace被問到點解着成咁、係咪怕被人襲擊時就笑住話梗係唔係，仲話完全唔關事，呢件疑似「避彈衣」其實係佢做運動嘅健身中心出品嘅，係畀健身房嘅教練或休息緊嘅客人覺得冷氣凍時着，而佢就買咗兩件返嚟放喺辦公室，話方便開會時唔使吓吓着西裝褸喎。
順利連任政制事務委員會主席
講番個會，Horace就冇接受提名，而會上有十三人競逐主席一職，喺民主派玩嘢下，最終都未選到正、副主席。此外，立法會政制事務委員會尋日亦開會選正副主席，Horace就順利連任主席，副主席仍未選出。