政情：謝偉銓出師不利 擔大旗即流會

點人數期間 慢必鄭松泰離開

委員會原定尋日早上八時半開會，發展局局長黃偉綸會就施政報告政策措施進行簡報。惟尋日開會時，會議室入面包括作為主席嘅Tony，最高峰都只有十一名議員，分別為八名建制派同三名民主派議員，其中民主派嘅陳志全（慢必）同鄭松泰更加喺點算會議法定人數期間就離開會議室。結果點人數法定時間結束，會議室都唔夠法定人數要求嘅十二人，Tony惟有宣布流會。雖然議員林健鋒最後都趕到返嚟，但佢進入會議室時Tony已宣布流會，所以都係挽救唔到大局。

朝早八時半開會 委員嗌唔好

Tony事後就話，嘥咗兩小時嘅會議時間好可惜，尤其係委員會早前已因選主席事宜浪費咗一次會議，依家仲要處理大量積壓多時嘅議程。事後有委員就問Tony可否即日重開會議，以及盡量避免喺早上八時半開會。Tony解釋，立法會尋日已有多個委員會會議，難以再搵到合適時間同會議室開會，而委員會喺八時半開會亦唔係乜嘢新事物或特別安排，所以都係希望議員今後盡力準時開會喇。

議員趕唔切開會固然唔妥當，但入咗會議室又走咗去又係咩玩法？慢必話，就算佢同鄭松泰冇離席，都仍然欠一名議員先夠人，而佢離開會議室係因為不滿建制派壟斷正、副主席，選完主席就退會，如果民主派仲配合去湊人數，就係縱容建制派。另一尋日有出席會議嘅民主派議員陳淑莊話，秘書處前晚已發短訊提醒議員開會，會議亦邀請咗十七名官員出席，批評大部分建制派議員都冇影，就連委員會副主席陸頌雄都缺席。

陸就解釋話佢朝早搭巴士途經西九龍公路，因該處發生交通意外，塞車塞咗廿多分鐘，所以遲咗返到。另一缺席議員鄭泳舜就話，因為朝早喺深水埗做緊地區工作，所以趕唔切開會，都覺得唔好意思喎。開會係議員重要職責，如果咁都做唔到，成日遲到甚至冇影，真係應該扣人工喇。