中環出更：鐵路小組1年僅開4會 陸頌雄安排惹不滿
港鐵沙中線問題多多，加上最近暴力示威者多次毀壞港鐵設施，搞到港鐵都要提早收車以便維修。立法會鐵路事宜小組委員會尋日開會並選出由勞工界議員陸頌雄同議員陳恒鑌（Ben）出任正、副主席。陸當選後隨即安排小組委員會嘅開會時間，但就被其他議員投訴佢一年只安排四次會議係完全唔夠。唔通陸想偷懶？陸就回應話自己唔係偷懶，而係每個委員會都要跟機制運作，依家惟有喺機制以外搵時間加開會議咁話。
解釋機制如此 泛民建制唔收貨
議員林卓廷尋日喺會上話，沙中線係焦點所在，到依家都未實行局部通車，工程質量、管理營運又出問題，之前紅磡仲出事故添，所以都希望小組委員會安排多幾次會議跟進。陸於是就叫林寫信申請，點知林就好激動咁話︰「同你講咪得囉，點解要寫信？都傻傻哋嘅！」
如果以為建制派會幫手打圓場，似乎就錯晒喇，建制派陣營嘅議員柯創盛亦都希望陸對政府「窮追猛打」，要逼運輸及房屋局交代沙中線問題。就連啱啱當選副主席嘅Ben都要求開會開密啲，以回應社會訴求。
陸就回應，佢都明白今屆小組委員會有好多嘢要跟進，會盡量安排時間，包括加會或者加長會議時間，會逼港鐵同運房局交代相關事宜喎。
卓妮