中環出更：馬清楠收埋珍貴舊玩具怕太太掉晒
古老當時興，舊香港總有獨特吸引力，勾起唔少人嘅美好回憶。早前保良局搞咗一個以懷舊香港作為主題嘅慈善盆菜宴，現場布滿具有香港特色嘅霓虹燈，玩味十足，保良局主席馬清楠都讚不絕口，仲透露自己都有懷舊一面，原來佢收埋唔少懷舊玩具，而且仲收得好密實，原來係怕太太發現後詐型，會掉晒佢啲懷舊玩具咁話。
保良局早前搞咗個慈善盆菜宴，以懷舊作為主題，現場有地道小食攤位、經典遊戲等，而且仲結合環保理念，使用可以重用嘅餐具，實行減少浪費之餘，有得玩又有得食，難怪吸引多名保良局董事局成員前來參加。而今次捧場嘅就有佢哋嘅副主席陳黎惠蓮、總理何許穎嘉等，一共筵開二百五十席，真係氣氛熱鬧，大家都打成一片。
馬清楠話，香港有唔少舊物值得收藏，好似郵票、車飛等，都好有價值。而佢就收藏唔少舊玩具，仲話將呢堆舊玩具收得好埋，因為怕太太發現之後會將佢嘅寶貝掉晒喎。
陳黎惠蓮鍾情懷舊小食
陳黎惠蓮亦都鍾意懷舊嘢，不過就唔係舊日嘅玩具，而係缽仔糕呢類懷舊小食，自言有時都會心掛掛，所以行街見到嘅話，就實會買嚟品嘗。懷舊小食種類多，佢就話最鍾意缽仔糕同白糖糕，事關會諗起以前媽媽買呢啲小食返屋企，畀佢哋七兄弟姊妹分享嘅日子，不過當時佢作為大家姐，所以經常都要讓細佬妹食先。佢又話，最記得食杧果時，自己只有果核食。呢個家姐認真唔話得。
何許穎嘉同老公就最掛住兒時去公園玩嘅鞦韆，話以前自己好大膽，趁父母望唔到佢，就會將鞦韆盪到最高，然後跳落地。聽落都覺得危險，好彩佢就未試過受傷。佢仲話，以前嘅鞦韆唔似得依家嗰啲為顧及安全而包到實，好玩刺激得多。不過，佢都明白公園要平衡趣味同安全，始終時代唔同，呢一代嘅父母都係着重子女安全多啲喇。
卓妮