政情：林曉盈員工有得加薪 籲港人向好嘅方面諗
最近社會氣氛欠佳，經濟逐漸轉差，商家大受影響，但有「手套女王」之稱嘅香港手套業商會會長林曉盈（Juliana）反而就叫大家唔好咁悲觀，話佢自己啲員工最近都仲有人工加添o架，叫大家正面應對，情況都唔係咁差，仲有好多機會咁話。
剛飛完越南 讚設廠好地方
Juliana話自己最近好少喺香港，問佢係咪覺得香港亂，要避一避先得？佢就話絕對唔係，係要周圍飛做生意，最近先去完越南，大讚當地配套設施好，覺得係一個唔錯嘅設廠地方。唔單止去嗰度做生意，佢仲好鍾意嗰邊嘅美食同咖啡，話依家回港都會自製冰咖啡飲！
雖然經濟差咗，但Juliana就話員工好有熱誠，自己就會搵藉口加人工畀佢哋，盡量鼓勵吓佢哋，令佢哋唔好咁負面，可以積極啲，公司會發展得更好。佢又透露，最近研發緊有紓緩效果嘅手套添！佢話有危就有機，叫大家多啲向好嘅方面諗，困難自然迎刃而解。