政情：劉永威 胡克平 助更生人士掌專業技能
與其以嚴刑峻法阻嚇釋囚不再重蹈覆轍，不如以社會暖流將更生人士納入正軌。建築測量師劉永威認為憑罰則嚟令人循規蹈矩，雖有其作用但未免流於消極，所以佢同任職工程師嘅老友胡克平，成立協助邊緣青少年同更生者嘅組織「永平慈善基金會」（基金會），向改過自新者授之以漁，從而甘於安分守己，先至係積極嘅做法。
提供與建造工程有關訓練
劉永威同胡克平分別出任基金會嘅主席同副主席。劉永威話更生人士重投社會嘅過程中，會因學歷不足或欠缺謀生技能，又或者遭原屬嘅專業團體取消資格，從而淪為低技術低收入嘅弱勢群體，如果可以掌握一門可以有較好收入嘅專業技能，就有助更生者重新做人。
因為兩人嘅專業背景，基金會向更生者提供嘅技能訓練，多數同建造工程有關。劉永威話建造業長期人手短缺，訓練更生人士勝過輸入外勞。胡克平就留意到唔少犯案者過去曾經遇上父母離異，或來自單親家庭，缺乏愛護以致誤入歧途，安排義工提供心靈輔導，亦係佢哋服務宗旨之一。