政情：環境局三萬蚊請人 專治大嘥鬼
環境局嘅政策成日都為人詬病，好似膠袋稅實施咗好幾年，但周不時仍然有濫發膠袋嘅情況發生，唔知係咪為咗紓緩不同嘅環保問題，環境局局長黃錦星近日喺社交網站專頁貼文，話局方會以月薪三萬蚊請合約助理媒體主任，幫助任何人做慳神，理順大嘥鬼惡習。睇嚟要教好大嘥鬼都唔平喎！
要分析民情 整圖剪片
睇番呢個職位嘅主要職責包括分析社交媒體平台反映嘅民情、協助因應民情而決定畀局長嘅社交媒體平台使用嘅內容、設計平台嘅圖像內容、幫平台貼文整影片同影相等等。
人工方面都幾吸引，持有大學學位嘅每月三萬零二百三十五蚊，非學位持有人月薪仍然有兩萬七千一百四十五蚊，合約為期兩年九個月。呢個職位尋日截咗止報名，相信競爭都會相當激烈o架啦。唔知邊個最後會成為大嘥鬼嘅幕後操控者呢？