政情：大會繼續有小息畀梁君彥抖吓
立法會主席梁君彥近日飽受冇人頂更之苦，下周三嘅大會都係得佢自己一個主持會議，睇嚟立法會秘書處都好體諒佢，尋日內務委員會一選唔到主席後，約一小時就即刻出文件，繼續安排小休同午膳時間畀梁君彥，等佢毋須直踩咁辛苦。咁樣遷就梁君彥，可謂身體最誠實！
每兩個幾鐘休息一次
六十八歲嘅梁君彥，雖然貴為大主席，但都不過係凡人，凡人總要食飯同去廁所，依家冇人頂更，安排啲小休同午膳時間，都係情有可原，相關嘅安排同過往差唔多，星期三有午膳時間同一次小休，星期四就多一次小休，即係梁君彥大約每兩個多小時就可以休息一次。
諗深一層，呢個方法對建制派有另一個好處，就係會議時間相對少咗，依家建制派不斷拉布，唔想咁快辯論議員議案，睇嚟都受惠於依家嘅會議安排，可以拉少幾個鐘。