中環出更：禁蒙面法公聽會 一日搞掂人數封頂
立法會不時需要舉辦公聽會聆聽公眾聲音，近期爭議極大嘅禁蒙面法都唔例外，負責審議嘅小組委員會終於決定到公聽會嘅安排，就係用最短時間、對獲邀出席名額封頂方式去搞喇。
《禁止蒙面規例》小組委員會一共有五十九名委員，早前立法會秘書處就收到四十九名委員回覆，有二十八人支持喺下周六（9日）朝九晚六舉行一次公聽會，亦有廿一人支持舉行兩次以上。
最多聽150團體個人意見
此外，有二十七人支持最多一百五十個團體代表或個人出席朝九晚六嘅會議，廿一人支持所有限期前登記嘅團體代表或個人都可以出席會議表達意見。最終委員會主席黃定光（象哥）根據委員回覆，決定下周六舉行公聽會，最多只係聽取一百五十個團體代表同個人發表意見，而登記會喺下周一早上九時起開始，以先到先得原則分配。
過往曾經有出席公聽會嘅公眾人士趁機喺會上示威，外界估計今次都好大機會上演類似場面，不過象哥就話相信市民唔會搞事，會真誠表達意見。佢又解釋，今次以「先訂立，後審議」方式立法，有時限性，最遲月尾就要返內會報告，所以唔能夠不停加會，今次都係經諮詢後，先決定開一次公聽會咁話。
卓妮