中環出更：周國豐不丹吸靈氣儲足正能量
「人生不如意事十常八九」，到底點面對唔順利嘅事情、點處理負面情緒呢？真係非常重要。香港國術總會副會長周國豐（Brandon）早前出席一個慈善鐘錶發布會時，講起點樣面對困難，佢就話最近同太太及朋友去咗不丹旅行，用咗一個星期時間喺嗰邊吸收天地靈氣，面對大自然覺得自己非常渺小，好多嘢唔使咁執着，負能量就自然唔會積聚咁話。
Brandon話，不丹境內有七成面積都滿布樹林及山水，周圍都係高山河流，景色怡人，加上係佛教國家，自己又係佛教徒，去到自然心境開朗啲，喺當地餐餐素食，真係好健康(口架)。佢話，成個行程幾乎日日都行山，一行就五、六小時，啲山路都好斜，有成三千幾米海拔，真係好辛苦，不過去完返嚟就覺得成個人放鬆咗唔少，好似充滿電咁。
莊家彬視困難為挑戰
轉個頭見到香港菁英會榮譽主席莊家彬（Albert），佢就話，自己面對困難好少會逃避，反而會視為挑戰或者鍛煉，會由淺入深去解決問題，將問題拆件，再逐一解決，同時又會搵朋友、家人傾訴，對方會畀好多支持自己。佢又講起，其實自己呢種唔會逃避嘅性格，都係受家人影響，成家人性格都好樂觀咁話。
珠寶設計師莊莎娜（Sarah）都有出席活動，佢就話每當喺工作或生活上遇到唔開心嘅事，都會收埋自己唔講嘢，或者睇吓啲喜劇紓緩吓，之後再約吓朋友出街，就算當下有幾唔開心，見完朋友都好快恢復番，唔會停留喺負面情緒太耐。而M Club榮譽會員吳均偉就話，自己鍾意約朋友一齊運動，打吓波出身汗，個人精神啲，就會開心啲。
卓妮