政情：泛民促交代保安資料 陳維安請食檸檬
過去幾個月發生連場示威，立法會大樓更成為衝擊目標，立法會行政管理委員會開會期間都作出多次唔同級別嘅保安安排，甚至讓警方進入大樓。不過幾位泛民議員就認為秘書處嘅保安安排阻住晒，亦都對警方進入大樓有意見，於是就去信立法會秘書長陳維安（Kenneth），要求佢出席今日嘅立法會內務委員會特別會議並提供相關資料。不過Kenneth就請「食檸檬」，表明唔會喺會議提供資料。
話說四名公民黨議員楊岳橋、郭家麒、陳淑莊同譚文豪本周三去信Kenneth，話Kenneth係行管會列席職員，內會正、副主席都係行管會當然委員，而依家內會選緊正、副主席，議員想知道主席人選對保安安排及警員進入立法會嘅取態，所以希望Kenneth出席會議提供資料，等議員投票時都有個譜。
解釋閉門會議內容保密
陳維安尋日回覆該信，解釋行管會會議係閉門舉行，討論內容亦都係機密，要得到行管會批准先可以喺內會提供資料。不過因行管會唔批准，所以佢係唔可以提供資料，仲話希望議員可以體諒佢喎。