中環出更：生意難做 許美德鑽研新菜式吸客

許美德話現階段生意係有影響，但都冇辦法，惟有做好自己出品，不停鑽研新菜式，同埋去其他地方取經，務求做到貨真價實去留住客人，仲話幸好公司喺香港扎根幾十年，有固定客路，佢期望事件盡快平息，回復番香港歌舞升平嘅日子！

轉頭見到主理私房菜嘅羅粉華、食肆嘅執行董事謝苑君同埋做食品生意嘅陳岳成。陳岳成話因為前舖後居嘅關係，所以細細個已經喺舖頭幫手，知道做生意隨着社會變化會有一定影響，仲話經歷過八十年代水楊酸事件，啲無良商人將水楊酸打入啲魚蛋裏面，等魚蛋可以鎖住水分彈牙啲，仲話嗰次事件令市民有一排唔夠膽買肉丸食。

羅粉華（左）同謝苑君（右）都話食材要夠新鮮先做到好菜式。

陳岳成自細就喺屋企嘅舖頭幫手。

陳岳成話當時都有幫手跟車送貨，啲貨好快就送完，仲同哥哥講又可以早啲去踢波嘞，點知畀哥哥當頭棒喝，話舖頭就嚟執喇，你仲咁開心！佢話依家知道無能力改變環境下，惟有堅持自己食物品質去取勝。

楊位醒：經濟差 結業都困難

在場又見到香港餐務管理協會會長楊位醒，佢話依家經濟好難搞，無一幸免，知道政府係有心幫，但未有實質行動減輕業界壓力，唔好話經營有困難，結業都好大困難，一來未完租約，二來仲要搵頂手，仲要畀員工遣散費，就好似近期咁，晚飯黃金時段，有啲人想食晏少少都唔得因為冇港鐵，車站又大排長龍，啲人出街食飯意欲減低，有啲家傭連放假都唔想出街，驚坐唔到車。

卓妮