中環出更：何君堯爆粗鬧曱甴 與鄭松泰掀罵戰
政府修訂《逃犯條例》爆發連串示威，年輕示威者被稱為「曱甴」。經常發表惹火言論嘅立法會議員何君堯尋日就喺立法會度叫班香港中文大學學生做「曱甴」，其他議員隨即群起批評，其中議員鄭松泰就要求何澄清。點知何仲未收口，反問︰「學生或者青年人知唔知乜嘢叫DLLM（粗口拼音）吖？」鄭隨即鬧爆何嘅言論係下三流。
話說何喺會上質疑政府喺教育方面撥款高達千億元，但大學就唔知培育咗咩社會棟樑，又話八月底中大迎新日，「嗰日有成三百幾個嗰啲曱甴」，以為伊斯蘭國遷咗去中大百萬大道喎。鄭隨即要求何澄清同收回言論，直指其描述唔恰當。但就被何寸番話︰「冇辦法喇，呢啲資質水平咁都聽唔明，你自己返去睇」。
身為中大校友嘅議員陳志全之後就質疑，何口中講嘅中大新生到底犯咗咩法，「就係你（何君堯）呢啲人見到年輕人去抗爭、去表態，就一竹篙打晒叫佢哋做曱甴」，直指要強烈譴責何。
講英文縮寫 梁君彥聽完冇反應
點知何似乎唔收口，講講吓仲反問︰「學生或者青年人知唔知乜嘢叫DLLM吖？」鄭其後發言時就鬧爆立法會主席梁君彥，質疑梁聽到「DLLM」竟然都冇反應。究竟梁係唔知背後意思，定係接受用英文縮寫去代替廣東話粗口就只有梁自己先知喇。
卓妮