中環出更：提供專業課程 姜炳耀助邊青更生者搵工
社會要關懷貧病老弱，離開監獄嘅更生人士都係極需社會關注嘅弱勢群體。傑出青年協會前主席姜炳耀，最近就加入新成立嘅「永平慈善基金會」並擔任總幹事，為邊緣青少年同更生人士重投社會出謀獻策。
姜炳耀以過來人嘅經驗，指更生人士要喺職場謀生殊不容易，而佢參與嘅慈善組織就打算提供課程，教導更生人士閱讀建築圖則、掌握做管工嘅技巧、學習使用紅外線儀器去檢測樓宇滲漏狀況等工作技能。
佢話把握一門有市場需求嘅專業，得以有較好嘅經濟收入，對更生人士而言非常重要，惟有如此，先可避免因貧困所迫而再度鋌而走險。佢又話犯過事留過案底，固然係一種遺憾，然而洗心革面嘅話，機會仲係有嘅。不過對於近幾個月來，被起訴「暴動罪」嘅抗爭人士，佢擔心呢班人士一旦罪成入獄，將來重獲自由，亦可能會有好多受到勇武抗爭而導致生意受損嘅僱主拒絕聘用。
周伯展巡監獄 了解服刑狀況
香港眼科醫學院前院長周伯展亦係永平慈善基金會其中一位榮譽顧問。雖然佢冇服務更生人士嘅經驗，但三十多年前，佢就已經定期到懲教所，為在囚人士提供眼科服務。獲委為太平紳士之後，亦不時巡視監獄了解在囚人士嘅服刑狀況。佢話加入服務更生人士嘅慈善組織，可以更全面咁幫助囚犯改過自新。
講起在囚人士，兒童繪本作者朱穎詩、紫荊青年商會會務顧問陳淑芝、仁濟醫院總理鄺晶晶聯同其他義工，早前應懲教署之邀，創作八個故事，然後到羅湖懲教所教導十六位在囚嘅媽媽點樣運用清晰嘅咬字發音、變聲同高低聲線嚟講故事，繼而將故事嘅錄音交畀佢哋嘅年幼子女，由點讀筆掃描繪本圖案之後播出。朱穎詩話教導在囚媽媽講故事，既可維持親子聯繫，又可令到在囚人士自覺於社會仍佔一席位，實在好有意思咁話。
卓妮