中環出更：做欄杆生意逆市賺錢 鄧國樑反而唔開心

各行各業近日生意都麻麻哋，大家都要諗計點樣救市，不過，仁濟醫院董事局總理鄧國樑尋日出席馬場舉行嘅仁濟盃時，就話自己生意嘅業績最近好咗。逆市賺錢，到底鄧國樑係做邊行咁威水呢？原來鄧生係做街道欄杆生意，呢排咁多大型示威遊行，就梗係好好生意喇！但佢就話其實唔多想賺呢啲錢，局勢搞到咁亂佢都好唔開心，希望可以快啲平息咁話。
仁濟盃咁難得，鄧國樑（左）梗係帶埋太太Grace（右）一齊嚟啦。
仁濟盃咁難得，鄧國樑（左）梗係帶埋太太Grace（右）一齊嚟啦。

鄧國樑話，聽聞政府現階段唔打算換壞咗嘅欄杆，只係用橙黃色嘅帶攔住，日後就算換，都會換一批新鐵欄，佢就建議新鐵欄嘅設計唔好上螺絲喇，因為好容易畀人拆爛，建議用「特別焊」形式，再加一啲有效防生銹嘅新技術。佢又話，其實自己最想事件快啲平息，因為示威者咁樣破壞基本設施，對爭取訴求無幫助外，又會影響市民日常生活。

王賢訊：市況唔好 影響籌款

主席王賢訊當然都有出席仁濟盃啦，佢就話依家對外有貿易戰，對內有示威，各行各業都比較差，經濟唔好確實影響籌款，但好彩仁濟係五十幾年嘅金漆招牌，好多善長仁翁仍願意捐錢，只係難度係高咗，因為市況唔好，大家用錢都謹慎咗，惟有自己勤力啲去搵人捐錢，但籌款方法就唔敢創新嘞，因為始終有風險，都係審慎為主，例如即將搞慈善步行呢個標誌性活動，希望籌款數字理想咁話。

王賢訊（左二）同副主席周松東（左一）、總理羅穎怡（右二）及蔡寶健（右一）合作，希望今年活動搞得盡善盡美。
  • 王賢訊（左二）同副主席周松東（左一）、總理羅穎怡（右二）及蔡寶健（右一）合作，希望今年活動搞得盡善盡美。
仁濟醫院當年顧問何德心（左）嘅千金何沅蔚（右），今年啱啱加入董事局。（徐家浩攝）
  • 仁濟醫院當年顧問何德心（左）嘅千金何沅蔚（右），今年啱啱加入董事局。（徐家浩攝）

何沅蔚：樓市遲吓會跌更多

至於今年先加入仁濟醫院董事局嘅總理何沅蔚，之前就從事地產，佢就話近期樓市有下跌趨勢，但可能遲吓更加明顯，而近年興嘅納米樓就真係有市場嘅，對年輕人或適婚人士都係一個唔錯嘅選擇，不過，佢覺得有樓唔係最重要，最重要係有份穩定嘅工作，咁無論有樓冇樓、升定跌，都唔使咁驚喎！

卓妮

第一手消息請下載on.cc東網iPhone/iPad/Android/Windows Phone Apps