中環出更：羅少雄怕老婆嚇壞 告別鐵騎士生涯
騎上電單車與風抱擁，係繼豆腐火腩飯以外，另一項男人的浪漫！國際專業保險諮詢協會會長羅少雄，唔單止係汽車發燒友，過去更係酷愛「二輪疾走」嘅鐵騎士，但最後竟然掀起頭盔告別鐵騎生涯。為乜？
羅少雄憶述考到私家車牌後，跟住就去學電單車，話只要具有踩單車嘅平衡力，要操控電單車其實係好容易上手，而喺電單車路試過關後，佢有時獨自兜風，亦有聯同其他車友結隊巡航，確係瀟灑。至於好多鐵騎士都嚮往嘅，後座載上意中人四處闖蕩，佢就話未試過，因為太太好注重安全，拍拖時已嫌電單車風險系數太高，婚後更按老婆嘅勸喻，告別鐵騎士生涯。大家知點解喇！
雖然唔再做鐵騎士，但羅少雄對台灣過去滿街電單車嘅風景線印象猶深。佢話當地曾有個傳聞，話若果電單車違泊畀政府拖走，買部台灣生產嘅新車，隨時較贖回舊車更划算，所以政府每隔一段時間就要將充公所得嘅電單車拍賣，而精明嘅商人就趁機購入，然後轉售到其他地區圖利。
仁愛堂前主席羅台秦係台灣人，但唔識駕駛電單車。佢話三十多年前，台灣嘅交通建設未夠完善，為免塞車費時失事，於是大家都以電單車代步，但隨住捷運投入服務，交通基建陸續落成，台灣舉目都係電單車嘅盛況已難復再。
藍鴻震更愛單車 話順便做運動
同場見到民政事務局前局長藍鴻震，佢就試過做電單車學神，但後來見「皮包鐵」太危險遂打退堂鼓。佢話電單車速度高無疑係頗刺激，不過佢就更愛靠自己雙腳先至有速度嘅單車，因為可以順便做運動嘛！佢提起以前派駐日本期間，會趁周日市面交通疏落，由東京麻布起程，踩單車往新浦安，而佢太太就自行搭車，約定喺終點見面。佢話一來一回要花六個鐘，運動量絕對足夠。
卓妮