中環出更：組團去黃山 楊孫西難忘如畫雲海

講起今次黃山之旅，楊孫西大讚，嗰度風景如畫，有啲人上到去山頂，都未必睇到雲海，佢哋一團十幾人有得睇，真係特別好彩，亦因而覺得好雀躍。講起黃山，自然不得不提茶葉，佢哋今次仲有去有百幾年歷史嘅茶莊參觀同品茶，玩足成個禮拜先返香港，認真過癮！

講番今次嘅作品展，展期已經開始咗，會展出至本月二十六日，合共有十位畫家約百多件作品。楊孫西就特別提到「黃山松雲圖」同「四時皆春」呢兩幅作品，佢話，呢班畫家由黃山返嚟，喺畫室用咗一日一夜共同創作呢兩幅畫，同一時間，有唔同年紀及派別嘅畫家，聚首一堂合作畫畫，真係相當難得咁話。

徐沛之感受大自然震撼

負責喺兩幅合作畫題字嘅中大藝術系兼任講師徐沛之，都有講起呢次黃山之旅，佢話，登頂初時好大霧，後尾散開咗，而且風景每一秒都有變化，雲海喺落完雨就出現，令佢感覺到大自然嘅震撼，仲話成班畫家見到雲海，即刻變晒細路仔添！

徐沛之（左）和何洵瑤（右）聯同另外八位畫家合力創作「四時皆春」。

莊毅堅（中）有份參與創作「黃山松雲圖」，佢嘅老師城大管理科學系主任陳友華（右）及副系主任曹國輝（左）都特別嚟欣賞。

春風畫會榮譽會長何洵瑤都有參展，佢話，自己最擅長嘅畫作係以花為主，喺黃山嘅杜鵑花同山下嘅唔同，嗰一帶嘅花係一束束咁生長嘅，佢就將杜鵑花嘅神態記入腦，只用咗半個鐘頭便完成喺「四時皆春」嘅部分。

講起畫畫，香港物聯網商會會長莊毅堅就認為，畫中國書畫嘅難處就係掌握色調，當知道畫作嘅框架，就可以得心應手咁話。

卓妮