政情：鄭明明嚴守餐單 望身形50年不變
為咗保持美好嘅身段，女士視減肥係終身嘅職業，而「美容教母」鄭明明嘅身形多年來都保持不變，究竟有乜嘢秘訣？原來佢有張自己嘅餐單，仲話希望身形可以保持住五十年不變添！
明明姐自有一套飲食法，就係早餐食雞蛋，但只食蛋白唔食蛋黃，肚餓就加杯脫脂奶，事關飲奶令皮膚靚，骨質又唔會咁易疏鬆。至於午餐，就鍾意食番薯，佢話好多人都話會肥，其實唔係嘅，因為番薯有營養又可以飽肚，而有時都會食飯，但就揀食糙米飯，夜晚早啲食飯，會有魚、雞同菜。
每星期食一次印尼蛋糕
咁甜品呢？喺印尼長大嘅佢就笑言最愛食甜品，尤其係印尼蛋糕，但只限每星期食一次。好多女士都鍾意食甜品，唔知可唔可以學明明姐咁忍得口呢？
仲有一件值得高興嘅事，就係佢早前去咗芝加哥出席國際權威美容組織CIDESCO舉行第六十七屆會議，獲頒發「美業專業貢獻功績勳章」，佢話呢個勳章肯定咗佢喺美容業嘅貢獻，又話芝加哥之行仲喺當地上咗唔少有關美容新科技同營養食療嘅課堂，佢話實行做到老、學到老。