政情：麥潤培大頭蝦 換盞燈泡 唔見銀包
跌咗銀包真係好麻煩o架！錢係一個問題，最重要係身份證、同信用卡等重要嘢，補領固然係煩，但係畀人盜用就大件事嘞！正如沙田區議員麥潤培（麥仔）近日亦唔見咗銀包，認真大頭蝦。
話說日前佢上門幫婆婆換燈泡，點知換到唔見咗銀包，驚到佢震，仲話搵過晒佢去過嘅家品店同行過嘅地方都見唔到之後，先懷疑係咪漏咗喺婆婆屋企。跟住佢就搵助理上門拍咗幾次門，但個婆婆唔開門喎。
見係陌生人 婆婆唔開門
咁點算好？佢都心諗大鑊嘞，事關乜嘢證件都喺晒入面。點做好？佢最後打電話畀老人中心，而中心又打畀婆婆，先發現原來婆婆一直喺屋企，見係陌生人就唔開門。呢位婆婆都好有防騙同防盜意識喎。
既然婆婆喺屋企，麥仔當然又再去拍門喇！順利入屋後，佢就發現自己個銀包真係喺婆婆部雪櫃上面。好彩係虛驚一場，但都係嗰句，失而復得唔係必然，麥仔以後就咪咁唔小心嘞！