政情：李鋈發細個煮飯燒燶鑊
香港係美食天堂，出街食都會有唔少選擇，同時都有人會選擇按自己口味自己煮。唔講唔知，原來鳳凰慈善基金會副主席李鋈發都係廚藝高手，十幾歲已經開始煮飯，雖然有次失手燒燶鑊，但依家已經熟晒手，間唔中都會煮番幾味同屋企人分享吓，每逢過時過節更加會叫齊親戚好友上屋企食飯添！
炸薯條好食過快餐店
李鋈發話自己最拿手嘅「撚手小菜」係家庭菜，好似生炒排骨、咖喱豬扒等等。咁邊款小菜煮得最好味？佢就覺得每樣佢都煮得好好食，其實唔止家庭菜，仲話整西餐一樣咁耍家，尤其係炸薯條同煎牛扒，炸薯條嘅水準仲掂過快餐店喎。真係？咁就要試過先知嘞！
同場見到嗇色園副主席黎澤森同嗇色園黃大仙祠監院李耀輝博士，問開平時有冇煮幾味？黎澤森就話仔女都結咗婚，搬咗出去住，平時多數都係同太太一齊食飯，兩個人唔會食好多嘢，亦習慣咗多菜少肉，其中太太嘅拿手菜係番茄煮蛋，清淡得嚟又健康啲，佢話受皮膚敏感影響，所以少食牛肉。