政情：住所樓下有警車 黃之鋒驚又被捕
最近連續數日各區已經出現多次大型嘅公眾活動，加上網上已傳今日都會有六區集會，喺十‧一前夕，香港眾志秘書長黃之鋒話喺佢住所樓下有警車停泊，仲話好擔心。其實佢咁驚，莫非「身有屎」？
家住海怡半島嘅黃之鋒尋日喺Facebook發文話，朝早準備落樓擺街站，但係就收到街坊用WhatsApp通知佢，話見到海怡港鐵站出口有警車停泊，仲影埋相畀佢睇。佢即刻話知道咗之後好擔心再次畀人拉，仲話「話晒聽日就係十‧一」，唔知警方會唔會重施故技，好似八三一前一日咁喺屋企樓下拉佢，之後就話最後落樓都冇事發生。
莫非心知做錯嘢
其實黃之鋒之前喺八月三十日朝早離開屋企去海怡港鐵站途中，遭警員拘捕，涉嫌「煽惑他人明知而參與未經批准集結」等三項罪名，同日押解往法院出席聆訊，獲准保釋，案件押後至十一月八日。但係點解佢今次又咁驚畀人拉呢，莫非佢心知又做錯咗啲乜嘢？