政情：八網難逃：先食為快顏汶羽擦大閘蟹
又到咗食大閘蟹嘅季節，暫時入嘅蟹量仍然少，但好多人都等唔切，寧願買貴蟹，先食為快，好似觀塘區議員顏汶羽就係其中一個，仲話係為咗減肥，惟有獨食難肥喎。呢個蟹癡擺明係搵藉口喇！
顏汶羽尋日喺Facebook上載咗張相，就係佢拎到兩隻大閘蟹。佢貼文話今年開始有大閘蟹出籠，身為蟹癡嘅佢當然急不及待先整兩隻試吓啦！而佢都承認啱啱出嘅大閘蟹係比平時貴，但等咗成年無計啦！
既然叫得做蟹癡，仲話用蟹嚟維繫友情，當然對大閘蟹嘅味道好熟悉。佢話呢兩隻大閘蟹嘅蟹膏未到全盛期嘅多同香，但嗰種獨有嘅香味，呢二十年嚟佢都唔會忘記喎，又話聽講今年係豐收年，蟹迷蟹癡等多排，就可以拆蟹啦！