中環出更：空置稅推上立會 蕭楚基：算係幫社會減怨氣
空置稅由舊年已經講緊，但依家政府就想正式推上立法會審議。有地產業人士就好不滿，覺得會令樓價跌。但仁愛堂諮議局委員蕭楚基就話呢項措施，算係政府做啲嘢，可以令社會減少怨氣。
卓妮早前喺一個場合見到蕭楚基，佢贊成立空置稅，話市面的確有好多空置單位，佢有好多朋友買咗樓都丟空，唔放租，想留起佢嚟賣，又話就算樓市真係下跌，都有好多原因，例如經濟因素、政治因素，未必因為空置稅。
許坤華：要畀機會後生仔
不過，佢相信樓市應該唔會有大變化，始終香港樓市有好大部分都係由國內人士支持，上面有好多有錢人，佢哋都係想要一個出路，應該會繼續落嚟買樓，再加上依家每個國家都印銀紙，搞到銀紙跌，用錢換樓保值係大趨勢。
轉頭見到香港愛馬女士協會榮譽主席許坤華同太太葉思貝，許坤華話空置稅早已定咗方向，志在必行，係啲地產商唔肯啫！佢話要解決貧窮問題就係要樓價跌，所以就由佢跌喇，希望樓價可以慢慢跌番三至四成喎。佢又話雖然自己都係既得利益者，算係處於人生嘅收成期，但都要畀機會後生仔買吓樓，又唔係要自己破產，唔係忍吓痛都唔得啊？佢仲話呢幾年有樓喺手嘅人都好有錢，相信唔會出現負資產嘅情況。
本身係物業公司董事嘅九龍樂善堂常務總理陳達華就話空置稅嘅稅太重，同埋佢覺得空置稅推出之後樓市供應可能會多咗，但都係幫唔到基層。佢認為要幫到基層，首先要政治環境穩定返，經濟先會好番啲。佢話就算空置稅令到樓市跌，都一定唔夠依家因為政治亂局而跌得咁勁。佢估計依家啲私樓都跌成三、四成，由一萬蚊一呎跌落九千蚊，但佢話空置稅對佢冇影響，因為佢又唔係發展商，同埋佢就係用空置嘅樓做樂屋幫基層嘅。
卓妮